ياريت تبطل تمثيل..وتعيش عيشة أهلك..
خواطر/ فتحي الشرقاوي
أنتم عارفين….إحنا ليه متوترين ونفسيتنا تعبانه
لأننا طول الوقت بنرسم قدام الناس صورة لينا
مش بتاعتنا وغير حقيقتنا الأصلية ….
عمال تبتسم وأنت جواك غل وغيظ..
عمال ترسم إنك مرن وأنت جواك مكلكع..
عمال تاخد وتدي في الكلام..
وانت شخصية احاديه جامده…
مابتعرفش غير اللي في دماغك بس
ازاي طول الوقت بتمثل وعامل توازن…
بين بريق بره وهمته وصراعات وتشويهات جوه
انت عارف تمثيلك المستمر ده …
ممكن يعمل فيك إيه ويوديك لفين…
تعالى نشوف مع بعض….
#اولا.
طول الوقت حاسس بأنك تعبان ومرهق نفسيا وانفعاليا.
من كتر مابتيجي على نفسك وبتكبتها وبتظهر عكسها
قدام ده وقدام دي و قدام دول…
السؤال..مين الناس دي اللي انت نازل تمثيل قدامهم….تفتكر ايه اللي هيفيدك….
لو الناس كلها قالت عليك كويس وانت مش كده
ياريت بدل ما انت طول النهار على مسرح الناس نازل تمثيل.
بنصحك ..تبذل نص المجهود ده في إصلاح نفسك
#ثانيا.
طول الوقت حاسس بأنك مشتت وتايهه ومش مركز.
في اللي حواليك..لأن كل قوتك العقلية والانفعاليه. والسلوكيه
مركزه إزاي تبقى ممثل بارع وشاطر
وعلى طول خايف اللي قدامك يكشفك..
#ثالثا.
إعتياد الناس اللي بتمثل عليهم الدور ..
بيخليهم يعتبروا اللي بتعمله معاهم..
هو أصللك وفصلك و حقيقتك ..
مابيعرفوش انه تمثيل و زيف.
وده بيخليهم متوقعين منك حاجات أنت في الأساس.
غير قادر على القيام بيها …
وبالتالي بتظهر قدامهم على طول بمظهر العاجز المتردد
#رابعا.
كثرة تمثيلك لأدوار غير حقيقتك..
هتخليك في لحظه مش قادر لا تعرف نفسك
ولا قادر تعرف غيرك ومش قادر كمان..
تفصل بين وشك الحقيقي ووشك المزيف
هنا بقى أول درجات الصراع النفسي..
ودخولك في دائرة المرض…
علشان كل اللي قولته ده..
ياريت ماتمثلش على حد بحاجه غير حقيقتك
هتلاقي نفسك متصالح مع نفسك..
ومركز مع نفسك ومع اللي حواليك..
ومفيش صراعات نفسية جواك…
وتريح نفسك وتريحنا معاك…
مش كده والا ايه…ياممثل…
