أكتر طفل مظلوم في المجتمع بسبب عدم فهم الناس لطبيعته ولاحتياجاته.
مين هو الطفل الحسي الحركي؟
هو الطفل اللي بيتقال عليه مبيقعدش وطول الوقت بيخرب
مع أن هو مش كدة هو كل تصرف بيقوم بيه راجع لحواسه ولمشاعره.
ربنا خلقه كده ذكائه في أيديه وفي حركته.
– بنحكم عليه بعدم التركيز بسبب حركته لكن هو مخه نشط جداً وعايز معلومات تدخله طول الوقت.
– بيحب أي حاجه فيها تلامس واستكشاف وحركة.
– وقت لعبه يهتم أكتر بالحاجات اللي بتتلمس زي الرمل والطين والعجين والصلصال بأنواعه. وعلشان كدة أكيد بيجرب يلمس كل كريمات ماما في البيت
– بيحب يستخدم جميع حواسه (يشم ويدوق ويشوف ويجرب)
– هنلاقيه بيحب الطبيعة وفي الأماكن المفتوحة هنلاقي تركيزه كله مع الزرع عايز يلمسه ويشوفه وممكن يدوقه كمان.
– هنلاقيه بيحب يلمس الأرض برجليه مش بس بأيديه ويحسها وبيبقي مستمتع جداً وهو حافي ورجله لامسه الأرض بأنواعها (حشيش او طين او رمل او بلاط) ولو لابس شوز هتبقي رجليه بتأكله ومش هيبقي مستريح لحد ما يقلع الشوز ويأخد راحته.
– خروجة المول مملة جداً بالنسباله وغالباً لو راح بيبقي متوتر ومتضايق طول الوقت علشان هو حاسس أنه مقيد ومش واخد راحته.
– ميعرفش يقف في وضع السكون زي أي شخص تاني لأن زي ما قولنا هي طبيعته الحركة وتعبيراته كلها بالحركة.
– مميز وذكي جداً ولو عايزين نطوره اكتر نهتم ونركز علي ال learn by doing لأن هو ال fine motor عنده قوية جداً.
– واثق من نفسه جداً وعارف هو بيعمل إيه وعنده هدف واضح وكل حركة بتبقي بحساب.
– يحب البوس والأحضان والتلامس الجسدي.
– خدوم وتنفيذي جداً مع اللي يحبه ويرتاحله.
– مبيهتمش بشكله ولا بشكل الناس اللي بيتعامل معاهم اهتمامه كله بمشاعره وحركته وحواسه.
– بيتفاهم جداً مع اللي نفس طبيعته لكن مينسجمش مع الطفل الهادي لأنه عكس طبيعته واهتماماته.
– موهوب ومحتاج اهتمام وتركيز علشان يفضّل مميز.
– لو أجبرناه علي حاجة عكس طبيعته او قيدناه ممكن يحصله أكتئاب.
– مبينساش الإهانات سواء اللي بالضرب أو الإهانة اللفظية.
– لو البيئة اللي هو فيها طول الوقت بتدفن في طبيعته هينفر منها.
طَيب تعالوا نعرف نتعامل معاه إزاي علشان نكسبه!
– أولاً محتاجين نحترم طبيعته ونوفرله احتياجاته..
(يعني عارفة أن أبني حسي حركي اوفرله أنشطة يدوية كتير وألعاب فك وتركيب وفي الخروجات اعمل حسابي أن لو هروح مول يبقي أروح مول في مكان يناسبه يقدر يتحرك ويتنطط ويلعب فيه براحته لأن هو محتاج يعمل اللي بيحبه زي ما أنا خارجة أعمل اللي بحبه)
– ثانياً محتاجين نركز علي التلامس ونشبع احتياجهم ليه طول اليوم ويبقي التواصل بينا اساسه البوس والأحضان. (صباح الخير، أهلاً وسهلاً، تصبح علي خير كله بالأحضان)
– ثالثاً محتاجين نحسسه اننا مهتميين بنفس اللي هو مهتم بيه وبنحب نعمله منحسسهوش أنه في حاجة غلط وأن اللي هو محتاجة ده حاجة غريبة بالنسبالنا. (نلعب معاه ونشاركه اللي بيحبه سواء أنشطة يدوية أو جري وتنطيط وزغزغة وهكذا…)
– رابعاً وده الأهم نحاول علي قد ما نقدر نتجنب العصبية والضغط عليه علشان مينفرش مننا (لو متضايق نديله وقته علشان يهدأ ونخلي كلامنا كله بهمس وبمشاعر وحب وإحتواء وقتها مش بعصبية علشان ميبقاش التأثير عكسي)
افهموا طبيعة أولادكم ودعموهم وساعدوهم يكونوا مختلفين.
لو فهمتوهم وتقبلتوا طبيعتهم دي بعدكم البيئة اللي حواليكم كلها هتتقبلها حتي المٌدرسة…
و الكل هيتعامل مع الطفل الحسي الحركي علي أنه مميز ومختلف وله اهتماماته وقدراته الخاصه مش علي أنه بيتحرك كتير وبيخرب.
إنتوا أساس البناء
إنتوا اللي هتجبروا الناس تتعامل مع أولادكم بأحترام لطبيعتهم وشخصيتهم… وإنتوا اللي هتسمحولهم يلزقوا labels مليانة كلام سلبي عليهم.
عارفة أن الموضوع محتاج مجهود كبير بس مجرد ما نعرف إيه هو الكود بتاعهم هنعرف نتعامل معاهم وهنبقي فخورين بيهم بعدين.
(و افتكروا دايماً انهم مميزين ومٌفكرين مؤثرين وليهم شخصية وكاريزما مختلفه من صغرهم وحريتهم هي ححياته
