من. كتر .الناس. إلى .١٠٠ وش
بقلم /سلوى وحيد
معقول جه اليوم اللى نتمنى نشوف فيه الناس اللى بوشين .. وبنغنيها كمان ؟ اد كدا المصالح طغت على الوفاء والاخلاص والحب فى الله ولله !
غنى معاك فلوس تبقى حبيبي وابن حبيبى ..فقير أف ريحتك وحشه .. يبقى شقيق وعلى اد حاله اخوه الغنى يبعد عنه لأنه الفرع الفقير ويعره وباقى العيلة تتملص منه بدل مايقفوا جنبه !.
أول ما ربنا يكرمه بمنصب الكل يتمحلس له ويبقى فلان بيه وسعادة الباشا الابتسامه على وشهم ومسح الجوخ يشتغل ومعالى الباشا راح معالى الباشا جه والرؤوس تنحنى .. فين الكرامه ياساده .. الكرسى له بريق فى عيون الناس وبتنسى أنه كان فى يوم من الايام رحته وحشه علشان فقره وقلة نفوذه .. ويامعالى الباشا شغل لى ابنى احنا طمعانين فى كرمك ومعالى الباشا يصدق وينسى المعامله السيئه !.
وتجاهلهم له ويعطى بكل ما فى وسعه ويقول فى قرارة نفسه دول اهلى مهما كان واصحابى ويلتمس الاعذار للكل واول مايزول الكرسى .. يظهرالوش التانى و تظهر قلة الأصل و تاخد حقها معاهم .
ولو ست طيبة وايدها سخيه تلاقى جارتها حواليها واهلها يخدموها برموش عنيهم و تحت رجليها اصلها بتصرف ببذخ ..ولو خلص فلوسها انسى الباب مايخبطش عليها ولاالجارة اللى فى وش الباب واللا مسكينة لو كانت من غير اولاد ، ممكن تموت وحيده فى شقتها بالايام ومحدش يعرف عنها حاجة لحد اعزكم الله ريحتهاما تطلع .
فين ناس زمان لما كانت الناس بتود بعضها واطباق الاكل طالعه نازله بين الجيران دا رز باللبن و دا طبق محشى والحب والوفاء لله مش للمصلحه .. النهارده الجار مات وجاره اللى جنبه بيجوز ابنه والابنته ومافيش حفاظ على مشاعر اهل الميت مع أنه كان الله يرحمه خدوم ومابيردش طلب لاي حد لكن قلة الأصل بعيد عنكم !
من كتر الناس إللى ب ١٠٠ وش وحشونا الناس اللى بوشين !!!…
