“فيلم الممر عمل حالة ماحصلتش من عشرات السنين”
“فيلم الممر عمل حالة ماحصلتش من عشرات السنين”
منال القاضي
اليومين دول في هجوم كبير جدا على الفنان أحمد فلوكس واحد من نجوم فيلم الممر، من ضمن الهجوم ده شخص اسمه “وضاح جاد” نشر بوست بيهاجم فيه أحمد فلوكس وبيقول إنه بيزور المدارس من وقت عرض الفيلم كإنه بطل حربي.
أحمد فلوكس نشر البوست سكرين شوت وشرح حقيقة الموضوع اللي مختلفة تماما عن الكلام ده، وحقيقة الموضوع إن أحمد فلوكس سفير مؤسسة صناع الخير للتنمية وبيشارك في فعالياتها، والصور اللي انتشرت له من مدرسة من المدارس كانت بمناسبة الاحتفال بإعادة افتتاح وتأهيل قرية دار السلام في الفيوم وده ضمن مبادرة حياة كريمة.
وضاح جاد اعتذر بعد كده عن البوست، لكنه ماكنش لوحده، وفي ناس كتير شاركت في حملة الهجوم دي، وللأسف بعض الناس دي مثقفين، طبعا إلى جانب تنظيم الإخوان الإرهابي اللي كاره أحمد فلوكس وكل اللي شارك في فيلم الممر، وهما أصلا حاطينه في دماغهم بسبب رده المؤلم على المقاول الإرهابي محمد علي.
بوستات كتير جدا بتتكلم عن “إيه يعني اللي عمله أحمد فلوكس ولا أبطال فيلم الممر؟ هما حاربوا بجد؟” الكلام ده بيطلع من بعض الناس اللي المفروض إنهم مثقفين وبيسفه من دور الفن، مع إن فيلم زي الممر عمل حالة ماحصلتش من عشرات السنين في مصر.
احنا حبينا نقول للفنان أحمد فلوكس بالبوست ده ماتزعلش من الهجوم عليك، انت فنان ناجح وجميل، وبتعمل خير وبتقوم بدور الفنان الإيجابي في مجتمعه.
نشر الوعي واجبنا كلنا.. لو استفدت بالمعلومة انشرها لغيرك
