خليني أحبك
بقلم / د – إسلام صابر حجاج
سؤال الست دايماً بتسأله هو الراجل بيحصله ايه لما بيكبر
تعالوا مع بعض نتطرق لموضوع مهم جداً بيشغل كل الرجالة قبل الستات ،
الاول تعالوا نعرف هو الراجل طبيعة حبه للست ايه بيحبها ازاي ونوع الحب ده ايه؟
في الحقيقه الراجل بيحب الست حب اسمه حب احتياج ؛ يعني ايه الكلام ده يعني الراجل بيحبني عشان مصلحته؟
لاء طبعاً مش كده ….
مش عشان مصلحته ولا حاجه وانما طبيعة حبه للست كده … حب اسمه حب الاحتياج …. طيب هو الراجل بيحتاج ايه في حبه؟
ايوه برافوا عليكم هو ده السؤال المظبوط
إحتياج الراجل في حبه بيختلف من راجل لراجل تاني من حيث نظرته للإحتياج
في راجل احتياجه للست انها تكون صديقته يقدر يحكلها كل حاجه ..
وراجل احتياجه انها بتعرف تطبخ وتشكله في كل الاصناف اللي بتعملها ..
وراجل تاني احتياجه ان دمها خفيف او فرفوشه وبتعرف تهزر …. وراجل احتياجه انها تكون تكون ست بيت شاطره وبتخلي بيته زي ماقال الكتاب …
وواحد محتاج واحده متفوقه دراسياً عشان تطلع اولاده متفوقين وتعرف تربيهم تربيه صالحه ..
وفي واحد صاحبنا محتاجها جميله يتباهي بيها قدام الناس كلها ويحضر بيها مؤتمرات او ندوات عمل او ماشابه ذلك .. وواحد عايزها ذكيه وتساعده في شغله ..
وكمان اللي هيحتاج انها بتكون بجسم حلو وطبعا حلو هنا بيختلف من راجل لراجل وده بيكون عشان يقدر يغطي احتياجه الجنسي وهكذا و الاحتياجات زي ماقولنا بتختلف من راجل لأخر
يبقي لازم كل ست داخل في حياتها راجل او هيدخل في حياتها راجل لازم تكتشف هو حبها حب احتياج من اي نوع عشان تقدر تحافظ علي هذا الاحتياج ويفضل شايفها قداموا بالاحتياج اللي هو محتاجه
طيب ايه اللي بيحصل للراجل لما بيكبر طبعا انا سامع الستات اللي بتقول انه ( بيتهبل لما يكبر)
لاء طبعاً هو مش كده خالص ولكن هو احتياجه بيتغير وانتي مش حاسه ..
فبيبدأ يدور علي احتياجه بعيد عنك لكن لو انتي ست شاطره دايماً تكتشفي احتياجاته وبالتالي هتقدري تحافظي عليه بشكل كبير
وكمان الست الشاطرة ماتسألش الراجل اللي في حياتها انت احتياجك ايه لانه ببساطه اما هيطلب حاجات كتير جدا انتي مش هتقدري تحقيقها او مش هيطلب منك حاجه وهتلاقي الرد النموذجي مش عايز حاجه من الدنيا غيرك كفايه وجودك معايا وما شابه ذلك
خليني أحبك وساعتها بس انتي لازم تتأكدي انك لبستي في الحيطه
لكن السؤال ممكن يجي بأشكال تانيه زي مثلاً ..
ايه اللي انا لو غيرته فيا هتزعل او مش هتكون مبسوط؟.
او ايه اللي لو كان موجود فيا جانب شخصيتي كنت حبتني اكتر؟
هنا بس هتلاقي الرد هيكون واضح وصريح وهيقولك حاجه فعلا بيحب وجودها فيكي وساعتها تحافظي عليها وكمان تكتشفي كل فترة نوع الاحتياج اللي حابب تكوني عليه من وقت للتاني
الراجل لما بيكبر احتياجه بيتغير مش بيتهبل.
