تربية بطعم القهر احذرى هذا النوع من التربية فيه سم قاتل

بقلم / د  إيمان السرياقوسي

ساعات الطفل بيدخل زعلان ومقهور على مامته ويقول لها ماما .. صاحبي ضربني
وتكون الاجابه انت السبب شوف عملت ايه و غلطت في ايه خلاه يعمل فيك كده.
والنتيجة رجل بالغ .. يعاني من جَلد الذات !
الحل اقوله اشرحلى الموقف وايه اللى حصل ونتكلم بهدوء

ممكن أب يعاقب إبنه و يقوله إنت محروم من اللعب
وابنه يقوله أنا عملت ايه .. فيرد الأب مش عارف انت عملت ايه ..خليك بقا من غير لعب لغاية ما تعرف ..!النتيجة رجل بالغ .. مصاب بفرط التفكير
الحل اشرح له ايه الصح وايه الغلط واطلب منه الاعتذار وعدم تكرار الخطأ

طفل زعلان وحزين الاب يسأله مالك فيقوله زعلان فيقوله طيب ما تزعلش خد كل الشوكولاتة ديه.
النتيجة رجل بالغ .. مصاب بالشراهة المصاحبة لمشاعر الحزن ..
الحل نسأله انت متضايق ليه ومين إللى مضايقك يعنى نحاول نعرف السبب عشان الطفل يشعر بالراحه.

طفل يرتمي في حضن أمه ويعيط جامد وبحرقه والام تسأله مالك يقولها إتخبطّ في الترابيزة ..فترد ماما وتقول كده يا تربيزة يا وحشة ؟ ليه تخبطي أحمد ! أوعي تعملي كده تاني ..خلاص يا حبيبي ضربتها ..!
النتيجة رجل بالغ .. يمارس الإسقاط ودائم إلقاء اللوم على الآخرين ويتبنى دور الضحية .
الحل نقوله ايه إللى بيخليك تعيط ونعرف السبب وتقوله..انت شاطر وذكى وخلى بالك بعد كده.

ابنى الصغير اتعور وكان معاه اخوه الكبير .. الام .. وانت كنت فين لما اخوك اتعور ..الطفل.. كنت بلعب ..الام .. ما انت انسان مهمل والله لو كان جراله حاجه كنت موتك.
النتيجة رجل بالغ .. فاقد الثقة بقدراته ..
الحل عدم استغلال الطفل الأكبر فهو ليس مراقب اومربي
وإعطائه دور القائد في العائلة فقط لمنع الغيرة بين الأخوة وليس لتحميله مسؤوليه ليست من واجبه.

طفل مش عاوز يعمل الواجب.. الام .. طب لو عملت الواجب هاجيبلك حاجه جميلة.
النتيجة رجل بالغ .. مادي .
الحل نساعدة ونجلس معاه عشان يخلص الواجب
طفل يتعرض للتنمر من زملائه ويشتكي لامه فيكون ردها خلاص معلش.
النتيجة رجل بالغ .. انطوائي أو مصاب برهاب اجتماعي ..
الحل ادخل الطفل دورات تعلم الرياضة لتقوية الثقة بالنفس او الذهاب مع والدة للمسجد او التسوق..مخاطبة المدرسة وأبلاغها عن الأمر دون علم الطفل ..لأن التنمر يؤثر في الطفل مدى الحياة لا يجب الاستهانة به
أم تشجع ابنها على السلوك الجيد وتقوله خليك مؤدب عشان أحبك 
النتيجة رجل بالغ .. يتخلى عن مبادئه مقابل أن يجد قبولًا من المجتمع .
الحل حب الام للطفل غير مشروط وتحسسه انها بتحبه مهما فعل وهذا يجعله صريح .
أب شديد ديكتاتورى يقول لابنه مافيش نفس تتنفسه بدون إذني وإلا هتتعاقب
النتيجة رجل بالغ لابد أن ينقاد ..تابع
الحل عدم ترهيب الأطفال هم ليسو لهم ذنب بما عشناه في الماضي من ظروف قاسية.
اولادنا امانه حافظوا عليها.